RUHAGOYACU.com

CAF CL & CC: Amakipe azakina imikino ya nyuma yamenyekanye-Mazembe ishobora kwisubiza icyo yegukanye umwaka ushize

Amakipe azakina umukino wa nyuma wa CAF Champions League n’umukino wa nyuma wa CAF Confederation Cup yamaze kumenyekana nyuma y’imikino ya 1/2 kirangiza yabaye mu mpera z’icyumweru gishize.

Mu ijoro ryo kuri iki cyumweru, ikipe ya AL Ahly yo mu Misiri yaraye ihaye isomo rya ruhago ikipe ya Etoile du Sahel yo muri Tunisia, iyinyagira ibitego 6-2 mu mukino wo kwishyura wabereye i Cairo, nyuma yaho umukino ubanza ikipe ya Etoile du Sahel yari yatsinze Al Ahly ibitego 2-1.

Al Ahly ifite ibikombe 8 bya Champions League, akaba ari nayo kipe imaze kwegukana iri rushanwa inshuro nyinshi, ikaba yakatishije tike y’umukino wa nyuma, aho igomba guhura n’ikipe yo muri Maroc ya Wydad Casablanca yasezereye ikipe ya USM Alger yo muri Algeria ku wa 6.

JPEG - 368.7 kb
Umukino wa nyuma muri Champions League uzahuza ibigugu 2 byo muri Africa y’Abarabu

Iyi kipe yo muri Maroc yatsinze USM Alger ibitego 3-1 mu mukino wo kwishyura nyuma yaho umukino ubanza yari yanganyirije i Alger igitego 1-1. Wydad Casablanca yasezerewe muri 1/2 umwaka ushize, ikaba isubiye ku mukino wa nyuma wa CAF Champions League, nyuma y’imyaka 6 itabasha kubigeraho. Iyi kipe imaze kwegukana iki gikombe inshuro 1 gusa, mu w’i 1992.

Muri CAF Confederation Cup ikipe yo muri Repubulika iharanira Demokarasi ya Kongo, Tout Poissant Mazembe yakoze akazi gakomeye inganyiriza muri Maroc 0-0 n’ikipe ya FUS Rabat.

JPEG - 97.5 kb
Mazembe yari mu itsinda rimwe na Super Sport none zongeye guhurira ku mukino wa nyuma

Mu mukino ubanza wari wabereye i Lubumbashi, ikipe ya TP Mazembe ikaba yaratinze FUS Rabat igitego 1-0. Ni ubwo yari impamba idahagije, ariko abasore ba Pamphile Mihayo bihagazeho i Rabat, babasha gusezerera iyi kipe yaho.

Mu w’undi mukino wa 1/2 waraye ubaye, ikipe ya Super Sport United yakatishije tike y’umukino wa nyuma isezereye ikipe ya Club Africain yo muri Tunisia ibitego 3-1, nyuma yaho mu mukino ubanza banganyirije i Tunis igitego 1-1.

Iyi kipe ya SS United yasezereye ZESCO United ya Iranzi Jean Claude muri 1/4, ikaba izahura na TP Mazembe bari kumwe mu itsinda rimwe.

Imikino ya nyuma:

CAF Champions League:

  • Tariki ya 27/10/2017: Wydad Casablanca vs AL Ahly (Maroc)
  • Tariki ya 03/11/2017: Al Ahly vs Wydad Casablanca (Misiri)

CAF Confederation Cup:

  • Tariki ya 17/11/2017: TP Mazembe vs Super Sport (RDC)
  • Tariki ya 24/11/2017: Super Sport vs TP Mazembe (South Africa)
Map : Ahabanza  \  Afurika  \  Ibikombe bya CAF

Ibitekerezo byatanzwe kuri iy'inkuru


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru