RUHAGOYACU.com

Mohamed Salah yatowe nk’umukinnyi w’umwaka wa 2017 muri Afurika

Umunya-Misiri; Mohamed Salah w’imyaka 25 yegukanye igihembo cy’umukinnyi w’umwaka wa 2017 muri Afurika, ahigitse umunya-Senegal; Sadio Mane bakinana muri Liverpool ndetse n’umunya-Gabon; Pierre- Emerick Aubameyang ukinira Dortmund, ni mu muhango w’ibihembo byabitwaye neza kuri uyu mugabane “Aiteo CAF awards 2017” wabaga ku nshuro ya 25 i Accra muri Ghana.

Mohamed Salah wakiniye Misiri imikino 10, akayitsidira ibitego bitanu, akanatanga imipira ibiri yavuyemo ibitego kuri bagenzi be, ni we wegukanye igihembo cy’umukinnyi w’umwaka wa 2017 muri Afurika, ahigitse bagenzi be.

Uyu mukinnyi yatowe ku majwi 625, Sadio Mane agira 507 mu gihe Pierre-Emerick Aubameyang yagize amajwi 311 ku mwanya wa gatatu.

Sadio Mane (ubanza ibumoso), Mo Salah na Aubameyang bari bahataniye igihembo cy'umukinnyi w'umwaka muri AfurikaSadio Mane (ubanza ibumoso), Mo Salah na Aubameyang bari bahataniye igihembo cy’umukinnyi w’umwaka muri Afurika

Salah watangiye umwaka ushize ari muri AS Roma, aho yatsinze ibitego 10 mu mikino 20, akanatanga indi mipira icyenda yavuyemo ibindi bitego kuri bagenzi be, nyuma yaje kugurwa na Liverpool, aho amaze kuyikinira imikino 29, atsinda ibitego 23 ari nako atanga indi mipira umunani yavuyemo ibitego ku bo bakinana.

Mohamed Salah yatangiye 2017 akinira AS RomaMohamed Salah yatangiye 2017 akinira AS Roma
Uyu mukinnyi yigaragaje cyane ubwo yari ageze muri LiverpoolUyu mukinnyi yigaragaje cyane ubwo yari ageze muri Liverpool
Salah yageranye na Misiri ku mukino wa nyuma wa CAN 2017, banabona itike y'igikombe cy'Isi cya 2018Salah yageranye na Misiri ku mukino wa nyuma wa CAN 2017, banabona itike y’igikombe cy’Isi cya 2018

Mu mwaka ushize wa 2016, igihembo nk’iki cyari cyegukanwe na Riyad Mahrez; umunya- Algeria ukinira ikipe ya Leicester City mu gihugu cy’u Bwongereza.

Ni ku nshuro ya mbere iki gihembo cyatangiye gutangwa na CAF mu 1992, gitanzwe uyu muhango utitabiriwe na Issa Hayatou wayoboye iyi mpuzamashyirahamwe y’umupira wa Afurika mu gihe hagati ya 1970 na 1992, iyi Ballon d’Or Nyafurika yatangwagwa na France Football.

Abakinnyi 16 nibo bari bamaze kwegukana iki gihembo mu myaka 24 ishize (1992 - 2016), aho Samuel Eto’o yacyegukanye inshuro nyinshi (enye) - 2003, 2004, 2005 & 2010, kimwe na Yaya Toure (2011, 2012, 2013 na 2014).

Abedi Pele (1992), George Weah (1995), Rashid Yekini (1993), Emmanuel Amunike (1994), Nwankwo Kanu (1996 na 1999), Victor Ikpeba (1997), Mustapha Hadji (1998), Patrick Mboma (2000), El Hadji Diouf (2001 na 2002), Didier Drogba (2006 na 2009), Frederic Kanute muri 2007, Emmanuel Adebayor (2008) na Pierre Emerick Aubayemeyang ni abandi bakinnyi babashije kwegukana iki gihembo kuva gitangiye gutangwa na CAF.

Aubameyang ni umwe mu bigeze kwegukana iki gihemboAubameyang ni umwe mu bigeze kwegukana iki gihembo

Mu bari bitabiriye uyu muhango barimo umuyobozi wa CAF; Ahmad Ahmad wanatanze ikaze ku bari baje, umunyamabanga wa FIFA, perezida wa Ghana; Nana Akufo-Addo, umufasha wa perezida wa Liberia; George Weah, umuyobozi wa Aiteo yateye inkunga iki gikorwa, abakanyujijeho barimo Didier Drogba, Carol Tshabalala n’abahanzi barimo Flavour n’abandi.

Ikipe Nkuru ya Afurika y’Epfo y’abagore niyo yatowe nk’iy’umwaka muri iki cyiciro ihigitse amakipe ya Ghana na Nigeria yombi y’abatarengeje imyaka 20 mu gihe Ibrahim Sunday yahawe igihembo cy’umukinnyi wakanyujijeho w’umwaka, Ahmed Yahya wa Mauritania aba umuyobozi w’umwaka .

Sadio Mane akinina na Mo Salah muri LiverpoolSadio Mane akinina na Mo Salah muri Liverpool

Wydad Casablanca yo muri Maroc ni yo yabaye ikipe y’umwaka, ihigitse TP Mazembe na Al Ahly, ni nyuma yo kwitara neza yegukana CAF Champions League, yayihesheje kwitabira igikombe cy’Isi cy’amakipe.

Hector Couper utoza Misiri, yahawe igihembo cy’umutoza w’umwaka, ahigitse Gernot Rohr wa Nigeria na L’Hussein Amoutta wa Wydad Athletic Club Casablanca, naho umunya-Zambia Patson Daka atorwa nk’umukinnyi ukiri muto mwiza ahigitse Krepin Diatta wo muri Senegal na Salam Giddou wo muri Mali.

Hector Couper utoza Misiri yabaye umutoza w'umwakaHector Couper utoza Misiri yabaye umutoza w’umwaka

Asisat Oshoala w’umunya-Nigeria yabaye umukinnyi w’umugore w’umwaka ahigitse Chrestina Kgatlana wa Afurika y’Epfo na Gabrielle Aboudi Onguene wo muri Cameroun, mu gihe kandi ikipe y’igihugu ya Misiri y’abagabo yabaye iy’umwaka nyuma yo kuza imbere y’iya Cameroun n’iya Nigeria.

Abagize ikipe y’umwaka ya Afurika yatowe n’abafana

Umuzamu: Aymen Mathlouthi (Tunisia & Etoile du Sahel).

Ba myugariro: Ahmed Fathi (Egypt & Al Ahly), Eric Bailly (Cote d’Ivoire & Manchester United), Ali Maaloul (Tunisia & Al Ahly).

Abakina hagati: Mohamed Ounnajem (Morocco & Wydad Athletic Club), Karim El Ahmadi (Morocco & Feyenoord), Junior Ajayi (Nigeria & Al Ahly), Achraf Bencharki (Morocco & Wydad Athletic Club).

Ba rutahizamu: Khalid Boutaib (Morocco & Yeni Malatyaspor), Mohamed Salah (Egypt & Liverpool), Taha Yassine Khenissi (Tunisia & Esperance).

Map : Ahabanza  \  Afurika  \  Amakuru ashyushye

Ibitekerezo byatanzwe kuri iy'inkuru


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru