RUHAGOYACU.com

Monaco yegukanye shampiyona y’Abafaransa nyuma y’imyaka 17

Ikipe ya AS Monaco yaraye yegukanye shampiyona y’icyiciro cya mbere mu Bufaransa, Ligue 1, nyuma y’imyaka 17 batayikozaho imitwe y’intoki.

Monaco babigezeho nyuma yo gutsinda Saint-Etienne ibitego 2-0 mu mukino w’ikirarane cya shampiyona bayakiriyemo kuri uyu wa Gatatu kuri Stade Louis II.

Kylian Mbappe Lottin w’imyaka 18, yatsinze igitego cya mbere hakiri kare, ku munota wa 19, ku mupira wavuye kuri Radamel Falcao mu gihe Velere Germain yashimangiye intsinzi mu minota y’inyongera y’umukino n’ubwo Saint-Etienne yagiye ibona amahirwe yo kuba yakwishyura.

Gutsinda uyu mukino bikaba byafashije ikipe ya Monaco yari ikeneye inota rimwe gusa ngo itware shampiyona, kubona igikombe cya 8 cya shampiyona y’Abafaransa, aho kuri ubu bagize amanota 92, amanota 6 barusha Paris Saint-Germain ya kabiri mu gihe hasigaye umukino umwe ngo shampiyona igere ku musozo mu mpera z’iki cyumweru.

Mpappe w'imyaka 19 yatsinze ibitego 15, Falcao w'imyaka 31 atsinda ibitego 24 muri shampiyonaMpappe w’imyaka 19 yatsinze ibitego 15, Falcao w’imyaka 31 atsinda ibitego 24 muri shampiyona

Monaco yaherukaga gutwara shampiyona irimo amazina akomeye nka: Fabien Barthez, David Trezeguet na Willy Sagnol. Uyu mwaka w’imikino, abenshi bemeza ko kuba irimo abakinnyi bakuze nka Falcao ndetse n’abakiri bato barimo Klyian Mbappe biri mu byayifashije kwitwara neza.

Iyi kipe ikaba yari mu cyiciro cya kabiri mu myaka itanu ishize, aho yarangije ku mwanya wa munani, mu gihe muri shampiyona ya 2011-12 yarwanaga no kutamanuka mu cyiciro cya gatatu, maze umwaka wakurikiyeho iza gutwara igikombe niko kuza mu cyiciro cya mbere.

Abakinnyi batwaranye nayo igikombe cya shampiyona y’icyiciro cya kabiri bakiri kumwe nayo ni: umuzamu Danijel Subasic, myugariro Andrea Raggi, Nabil Dirar ukina hagati na rutahizamu Germain.

Mu rwego rwo kwishimira iki gikombe cya shampiyona bari bamaze imyaka igera kuri 17 badatwara, ikipe ya Monaco ikaba yaratumiye umuhanzi w’umunyamerika; 50 Cent aho azasusurutsa abakunzi b’iyi kipe tariki ya 21 uku kwezi ubwo bazaba bamaze gukina na Renes ya 9 ku rutonde rwa shampiyona, hasozwa iyi shampiyona y’u Bufaransa.

50 Cent azakorera igitaramo i Monaco kuwa Gatandatu50 Cent azakorera igitaramo i Monaco kuwa Gatandatu

Map : Ahabanza  \  Burayi  \  Shampiyona

Ibitekerezo byatanzwe kuri iy'inkuru


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru