RUHAGOYACU.com

Ijisho rya Ruhago: Amaganya y’umupira w’amaguru m’u Rwanda

Asyi!

Ndabarambiwe mwese aho muva mukagera.

Harya ngo ndi nk’ikimodoka gishaje giparitse,

Ugiciyeho wese akuraho agapiyese?

Muzarya mumare?

Muzarya se mwijute?

Byibura se ndabaryohera?... Oya ndabizi nteye iseseme.

Iyo icyo kimodoka kiba kizima se?

Muri mwe se ni nde uzi aho tugana?

Twahamenya dute se nta kerekezo, nta murongo ngenderwaho?

… Kandi icyo nzira ndakizi!

Kwiyemera kwanyu mu byo mudashoye,

Kwiremereza aho gutega amatwi ngo mu gishe inama,

Gusesagura mwiruka imihanda,

Muhimba mupfundikanya utuntu tudafite epfo na ruguru,

Gutonesha uyu, mukanyangira uriya!

Muri ibyo byose se mumariye iki? … puu! muri abokundakaza gusa.

Nabashuhuje Afande… nibe namwe gusa!

Amambere twajyanye i Tunisi mu gikombe cy’Afrika,

Twakira abatarengeje 20 na 17 b’ibihangange by’Afurika,

Tujya n’i Mexico mu gikombe cy’isi ku batarengeje 17.

Ariko namwe nta byanyu mwarantereranye!

iyo munsiga mu muhanda ufite iyo ugana byari kubatwara iki?

Ba bancashuro mwasiganye nabo,

Dore barambyize cyane ndenga umuhanda!

Ndetse na twa twana twanyu twatorejwe mu gikari cya FERWAFA,

Twicaye hano… natwo twarawurenze.

None twese twifashe mafpubyi twabuze nuza kuhadutoragura.

Bamwe bishimira kuvuga ngo “awa!” ni tuhagume twikoce.…. Ibaze nawe!

Mukomere namwe garafurere abanyamakuru beza!

Mwarayavuze muyabagira ibisiga koko!

Ko mutavuze “iby’umwijuto w’ikinonko” se?

Ntiyaguye yose ikaba arinjye ihitiraho!

Abo twatohanye m’umwenda n’ibara ry’igihugu se,

singabariya, hari n’ubikoza?

Mbese dufate ko ari ntacyo bamarira mu kunteza imbere?

Gupfa, napfuye mpagaze! Ariko mureke mwese mbisabire:

Mpera umwana muto gahunda ihamye kandi iramba.

Mpera umwana muto umupira akine.

Mpera umwana muto ikibuga yidagadure.

Mpera umwana muto umutoza uhagaze yemye.

Mpera umwana muto amarushanwa.

Mpera umwana muto amata maze atonore itoto.

Maze mumpe umwanya murebe ko ntabereka ibirori!

Ese uyu mupira w’i Rwanda ufite kiririra?… Tubitege amaso!

Ibitekerezo byatanzwe kuri iy'inkuru

  1. Fabien

    Kuya 14-08-2015 saa 12:22'

    Iyaba Kubivuga Ariko Byakorwaga, Namwe Mwaba Mwagerageje Kbsa! Turabemera.

  2. NIYITANGA VALENS

    Kuya 12-08-2015 saa 08:03'

    MPAMO THIER WATUBWIYE UYUMUNU NTUKIFATANYA NAWE AFITE IBITEKEREZO BYI

  3. Mugisha olivier

    Kuya 12-08-2015 saa 03:51'

    Mur abant b’abagab kbs,nimukomerezaho!

  4. ngabo richard

    Kuya 11-08-2015 saa 12:42'

    hahahhh sha muri abahanga kbs. Kuko ibyo mwanditse muri iyi nkuru nibyo completely. Mukomeze mubake rahago nyarwanda natwe tubari inyuma.

  5. Eric

    Kuya 10-08-2015 saa 14:25'

    Ahaaaaaa Mana Umva Amasengesho Namaganya Yababantu Mana Dutabarekuko Turakomerewe

  6. chadad

    Kuya 10-08-2015 saa 03:50'

    hahahahaha ayo maganya niyo gusa hari bamwe babibonyemo akaryo gsa bizabagaruka amaherezo!

  7. mugisha

    Kuya 10-08-2015 saa 03:13'

    Eeeh!! iki kinyarwanda konumva gikaze wangu!!


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru