RUHAGOYACU.com

Abanyarwanda babiri mu isiganwa ry’amagare rikomeye mu Butaliyani

Abanyarwanda babiri, Areruya Joseph na Mugisha Samuel bari mu bakinnyi 174 bazaba bari mu isiganwa rikomeye ryitwa “Giro d’Italia” cyangwa “Giro Ciclistico D’Italia” ry’abatarengeje imyaka 23.

Areruya Joseph ni umwe mu bakinnyi bakomeye mu gusiganwa ku igare, ndetse yegukanye umwanya wa kabiri muri Tour du Rwanda 2015, ntiyahirwa cyane mu 2016 kuko ho yegukanye umwanya wa 5, ariko agakomeza kwiyerekana nk’umukinnyi ukomeye.

Mugisha Samuel we ibigwi bye arabyihariye mu banyarwanda, kuko yegukanye umwanya wa mbere mu bakinnyi bazi guterera cyane kurusha abandi muri Tour du Rwanda 2016.

Bombi bahise babengukwa n’ikipe ya Dimension data for Qhubeka yo muri Afurika y’Epfo, hagendewe ku buhanga bwabo n’ubuke bw’imyaka bafite, bahita bajya gusimbura Ndayisenga Valens na Bonaventure Uwizeyimana bari barangije amasezerano muri iyo kipe y’ubukombe mu ruhando rwa Afurika.

Mugisha Samuel (washyize intoki ebyiri hejuru) na Areruya Joseph bamaze amezi 6 muri Dimension data for QhubekaMugisha Samuel (washyize intoki ebyiri hejuru) na Areruya Joseph bamaze amezi 6 muri Dimension data for Qhubeka

Nyuma y’amasiganwa atandukanye bitabiriye kuva mu Ukuboza 2016, Areruya na Mugisha baraba bari mu gikundi cy’abakinnyi 174 bazatangira isiganwa ryitwa “Giro d’Italia” ry’abatarengeje imyaka 23, rizatangira kuri uyu wa 9 Kamena.

Dimension data for Qhubeka ni imwe mu makipe 29 azaba ari muri iryo rushanwa, ikazaba igizwe n’abakinnyi batandatu barimo Areruya Joseph na Mugisha Samuel utari uri ku rutonde ariko akaza kongerwamo asimbura umwe muri bagenzi be wakoze impanuka.

Iryo rushanwa rizaba rigizwe n’uduce (Etapes) turindwi, aka mbere kakazakinirwa ahitwa Imola ari na ho kazasorezwa, kakaba kagizwe n’ibirometero 132.2, aka kakaba ariko Areruya Joseph ashobora kwigaragarizamo, cyane ko azwi ho kwihuta (Sprint) kandi ako gace kakazaba gaha amahirwe menshi abakinnyi bo muri icyo cyiciro (sprinters).

Mugisha Samuel (wambaye Cogebanque) na Areruya Joseph bita 'Kimasa' (wambaye Soras)Mugisha Samuel (wambaye Cogebanque) na Areruya Joseph bita ’Kimasa’ (wambaye Soras)

Agace ka kabiri (Etape 2) kazakinwa kuwa 10 Kamena, aho abasiganwa bazahagurukira ahitwa San Antonio bagasoreza ahitwa San Valentino, ku ntera y’ibirometero 145,8. Aka gace ni ko Mugisha Samuel yakwigaragarizamo, dore ko gaha amahirwe abakinnyi bazamuka (climbers), ari na cyo cyiciro afitemo ibigwi.

Agace ka gatatu (Etape 3) ko kazakinwa kuwa 11 Kamena, aho abakinnyi bazahaguruka ahitwa Bagnara Di Romagna berekeza ahitwa Forli, ku ntera y’ibirometero 140.5, aha na ho hakaba hahabwa amahirwe abakinnyi bazi kwihuta (sprinters), kimwe n’agace ka kane (Etape 4) kazakinwa kuwa 12 Kamena, bagahaguruka i Forli berekeza Gabicce Mare, ku ntera y’ibirometero 155,5.

Agace ka gatanu (Etape 5) kazakinwa mu byiciro bibiri kuwa 13 Kamena, aho abakinnyi bazahaguruka ahitwa Senigallia berekeza i Osimo ku ntera y’ibirometero 87.2, bagahita bakina basiganwa n’igihe (ITT) ahitwa Campacavallo, ahareshya n’ibirometero 14.

Agace ka gatandatu (Etape 6) kazakinwa kuwa 14 Kamena, aho Mugisha Smauel, Areruya Joseph (nibazaba bakiri mu isiganwa) bazahaguruka ahitwa Francavilla Al Mare berekeza i Casalincontrada, ku ntera y’ibirometero 132,2.

Agace ka karindwi (Etape 7) ari na ko ka nyuma kazakinwa kuwa 15 Kamena, aho bazahaguruka ahitwa Francavilla Al Mare berekeza ahitwa Campo Imperatore, ku ntera y’ibirometero 148,9.

Iryo rushanwa rizitabirwa n'amakipe 29 akomeye ku IsiIryo rushanwa rizitabirwa n’amakipe 29 akomeye ku Isi

Map : Ahabanza  \  Indi mikino

Ibitekerezo byatanzwe kuri iy'inkuru


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru