RUHAGOYACU.com

IJISHO RYA RUHAGO: FIFA irasaba FERWAFA gushyiraho umuyobozi wa tekiniki

Ukubura k’umuyobozi wa tekiniki bikomeje kundindiza iterambere ry’umupira mu Rwanda, ndetse FIFA ibishingiraho ihagarika imfashanyo.

Kuva mu 2008, Ishyirahamwe ry’umupira w’amaguru mu Rwanda (FERWAFA) ntirikozwa kugena umuyobozi ushinzwe ibya tekiniki muri iryo shyirahamwe. Ndetse abasesenguzi, mu mpaka za buri munsi, bakaba binubira iyo myitwrire ikomeje kudindiza ruhago y’u Rwanda.

Ijisho rya Ruhago ryongeye gutera akajisho ku bintu by’ibanze bikomeje kwangirika kubera kutagira uyu muyobozi. Dore ko bimwe byagarutsweho ubwo Jean Michel Benezet umujyanama wa tekiniki mu ishyirahamwe ry’umupira w’amaguru ku isi (FIFA), yasuraga FERWAFA mu byumweru bibiri bishize. Ndetse agataha adusigiye inkuru mbi, y’uko u Rwanda rutakibarizwa mu bihugu biterwa inkunga n’ikigega cya FIFA “The Financial Assistance Programme” (FAP).

Mu mwaka 2007, Ishyirahamwe ry’umupira w’amaguru m’Ubudage rubinyujije mu bufatanye na FERWAFA, ryatanze Michael Weis ngo abe umuyobozi w’ibya tekiniki muri FERWAFA. Gusa, ntiyacanye uwaka n’ingoma ya Brig General Kazura Jean Bosco. Nyuma yo kumuha akato, uyu mwanya ntiwitaweho.

Bamwe mu basesenguzi bakemeza ko inshingano zawo, zikumira amwe mu manyanga akorerwa muri FERWAFA. Urugero n’inkishyirwaho ry’ikipe Isonga FC ndetse no kuyishyira mu kiciro cya mbere mu buryo budasobanutse. Benezet nawe yarabinenze, cyane ko yagaragaje ko abana bakwiye kugurishwa na FERWAFA bityo hakaboneka ubushobozi bwo kurengera ishuri ry’umupira kuri ubu riri mu mazi abira.

Mu mwaka 2009, abana batarengeje imyaka 15 ba mbere, bari binjiye mu ishuri ry’umupira rya FERWAFA ku gihe cy’imyaka 3; ndetse twese tuzi umusaruro mwiza w’aba bana. Nyamara ariko, ikiciro gikurikira na n’ubu ntikirakandagiza ikirenge mu nyubakwa ziri shuri, kubera ukutagira umurongo ngenderwaho mu gukurikirana aba bana. Akazi kagenewe ushinzwe ibya tekiniki muri FERWAFA.

Ikindi gikomeje gushyushya imitwe y’abakunzi ba ruhago, ni shampiyona z’ibyiciro byose zisa nka baringa. Hashize imyaka itari mike, zirangwa n’igura/gurisha rinyuranyije n’amategeko, ruswa, ukutubahiriza gahunda y’imikino, n’ibindi binyuranye, byose bikaba byonona iterambere ry’umupira wacu. Abasesenguzi bahamya ko uyu muyobozi wa tekiniki ahari, shampiyona yafata indi sura, bityo igafasha amakipe n’abakinnyi kwiyubaka, banubaka AMAVUBI atandukanye ku byiciro byose.

Mu mwaka 2007, FERWAFA yemeje ingamba zagenderwaho mu gutoranya uyu muyobozi. Ariko kandi, ntizanyuze benshi cyane ko zisa nk’izikumira abanyarwanda guhatanira uyu mwanya. Mu gihe rero FIFA y’awugize kamara kugirango u Rwanda rube rwabona ifashanyo, haribazwa uko biraza kugenda, bityo n’abanyarwanda babishoboye babone uko bawuhatanira … tubitege amaso!

Map : Ahabanza  \  Rwanda  \  Ibitekerezo

Ibitekerezo byatanzwe kuri iy'inkuru

  1. niyongabo

    Kuya 2-09-2014 saa 04:12'

    muraho bakunzi baruhago mukuri niba uwomwanya uhari koko nituwuharirire umunyarwanda kandi mumenyeko uwo mwanya aringenzi koko kuko dukeneye umutekinisiye muri ferwafa kugirango bimwe mu bibazo duhura nabyo bigende bikemuka

  2. kalim

    Kuya 8-05-2012 saa 16:41'

    Ferwafa rero nishyireho uwo mwanya kandi ugenerwe umunyarwanda kuko ntabwo twavuga ko ntabo dufite kuko hari abanyarwanda benshi basobanukiwe ibya Football kandi tuziho ko bafite ubushobozi bwo kuba bakora ako kazi,kuko ntabwo byumvikana ukuntu uwo mwanya wahabwa umunyamahanga utanazi ibyo mu Rwanda utazi aho bijya n’aho biva,ikindi kandi ntabwo wafata coach mukuru w’ikipe y’igihugu ngo nurangiza ufate Directeur Technique nawe umugire umunyamahanga,njye numva ntaho twaba tujya.mubyigeho neza kandi abanyarwanda barahari


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru