RUHAGOYACU.com

Bamwe muri Njyanama ya Huye basabiye Mukura VS kongererwa ingengo y’imari

Nyuma yo kugaragarizwa n’Ubuyobozi bwa Mukura VS impamvu ari ngombwa, bamwe mu bagize Inama Njyanama y’Akarere ka Huye basabiye iyo kipe ko yakongererwa ingengo y’imari, kugirango ibashe guhangana n’izayihangaye muri uyu mwaka w’imikino kubera amikoro.

Kuri uyu wa gatanu tariki ya 30 Kamena ni bwo Inama Njyanama y’Akarere ka Huye yateranye ngo isuzume kandi yemeze ingengo y’imari ako karere kazakoresha mu mwaka wa 2017-2018.

Nk’uko Kigali Today ibitangaza, Dr. Jean Chrisostome Ngabitsinze, Perezida w’Inama Njyanama y’Akarere ka Huye yagaragarije bagenzi be anabereye umuyobozi ko Mukura VS igenerwa Miliyoni 72 kuva mu myaka itandatu ishize, kandi ibiciro ku masoko byariho icyo gihe si byo biriho ubu, agaragaza ko ingengo y’imari iyo kipe igenerwa itakijyanye n’igihe.

Inama Njyanama y'Akarere ka HuyeInama Njyanama y’Akarere ka Huye

Ati “Ariya mafaranga yagenewe Mukura kuva mu myaka itandatu ishize. Ahanini ni ayo kwishyura imishahara. Simpamya ko abakinnyi bandi amafaranga bahembwaga mu myaka itandatu ari yo bagihembwa.”

“N’ibiciro ku isoko byagiye byiyongera, wareba n’andi makipe afashwa n’uturere ugasanga twebwe turacyari inyuma. Nka Bugesera igenerwa miliyoni zisaga 170.”

Mukura VS igenerwa Miliyoni 72 gusa mu gihe bivugwa ko amakipe akomeye nka APR FC, Police FC na AS Kigali yo akoresha ingengo y’imari irenga miriyoni 300 ku mwaka.

Igitekerezo cya Ngabitsinze cyashimangiwe n’Umunyamabanga Nshingwabikorwa w’Akarere ka Huye wongeraho ko aho imishahara y’abakinnyi yatangiriye gusoreshwa, bityo MukuraVS ikaba yari ikwiye kugenerwa byibura miriyoni 96, mu gihe imishahara y’abakinnyi yaba itiyongereye.

Mukura VS ishobora kuzakurwamo inkingi za mwamba uyu mwakaMukura VS ishobora kuzakurwamo inkingi za mwamba uyu mwaka

Inama Njyanama y’Akarere ka Huye yashingiye kuri ibyo byifuzo, isaba komisiyo y’ubukungu yayo kuziga kuri icyo kibazo, ikareba amafaranga Mukura VS ikwiye kugenerwa n’aho yava, bityo mu gihe cyo gusubiramo ingengo y’imari (révision budgétaire) ikazongererwa.

Umunyamabanga Mukuru wa Mukura VS, Niyobuhungiro Fidele yatangarije RuhagoYacu ko bagaragarije Ubuyobozi bw’Akarere ka Huye ko ingengo y’imari bagenerwa ikwiye kongerwa, bakaba bari bategereje ko icyifuzo cyabo cyemerwa ngo babone kwicara barebe amafaranga akwiye kwiyongeraho.

Ati “Twari twabisabye, ntabwo twagaragaje ayo baduha, icyo twebwe twagaragaje ni uko ari make ntacyo yamara ubu, ubundi tukazabyigaho nyuma tukareba ayo dukeneye, ayo akarere kaduha n’ayo twakura mu bandi bafatanyabikorwa ba Mukura VS.”

Mukura VS ni imwe mu makipe yakunze kuvugwamo ibibazo by’amikoro yagiye aba imbogamizi ku guhatanira ibikombe n’andi makipe akomeye, ndetse uyu mwaka wa shampiyona (2016-2017) uri mu myaka yabereye mibi iyo kipe, aho yasoreje ku mwanya wa 12 n’amanota 32, irushwa amanota 41 na Rayon Sports zari zisanzwe zihangana.

Mu mwaka 2017-2018, Akarere ka Huye kazakoresha ingengo y’imari ingana n’amafaranga y’u Rwanda 15,893,288,471.

Map : Ahabanza  \  Rwanda  \  Amakuru Ashyushye

Ibitekerezo byatanzwe kuri iy'inkuru


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru