RUHAGOYACU.com

Degaule muri Morocco mu kunoza imishinga y’ibikorwa remezo by’umupira w’amaguru

Perezida wa FERWAFA, Nzamwita Vincent Degaule ari mu ruzinduko rw’akazi mu bwami bwa Morocco, ku butumire bw’Umuyobozi w’Ishyirahamwe ry’umupira w’amaguru muri icyo gihugu (FRMF) akaba n’umwe mu bagize akanama k’ubuyobozi ka CAF, Fouzi Lekjaa.

Nk’uko bitangazwa n’Ishyirahamwe ry’Umupira w’amaguru mu Rwanda (FERWAFA) ku rubuga rwaryo rwa Internet, kuri uyu wa mbere tariki ya 5 Kamena ni bwo Nzamwita yatangiye uruzinduko rw’icyumweru muri icyo gihugu, akazaboneraho kuganira na Fouzi Lekjaa ku mishinga y’ibikorwa remezo hagati y’amashyirahamwe y’umupira w’amaguru mu bihugu byombi igitegereje gutangira gushyirwa mu bikorwa.

Perezida wa FIFA, Gianni Infantino ni we washyize ibuye ry'ifatizo ahubakwa Hotel ya FERWAFAPerezida wa FIFA, Gianni Infantino ni we washyize ibuye ry’ifatizo ahubakwa Hotel ya FERWAFA

Muri yo harimo uwo kubaka Hotel ya FERWAFA ndetse no kubaka ibibuga by’umupira w’amaguru mu bice bitandukanye by’u Rwanda, hagamijwe kuwuteza imbere.

Biteganyijwe kandi ko Degaule azahura n’Abayobozi b’ikigo cy’ubwubatsi “Coter Terhrazaz Construction company”, kizubaka ibibuga by’umupira w’amaguru mu turere tumwe na tumwe tw’u Rwanda, icyo kigo kikaba ari cyo cyubatse ibibuga 63 bifite ubwatsi bw’ubukorano (Artificial turf), ndetse n’ibindi bitanu bifite ubwatsi bw’umwimerere, kikaba kandi kirimo no gutegura kubaka ibindi bibuga 40.

Muri Mata uyu mwaka, ni bwo itsinda ry’abantu baturutse mu Ishyirahamwe ry’umupira w’amaguru mu bwami bwa Morocco bagiriye uruzinduko mu Rwanda, ubwo hakorwaga inama yahuje abashoramari basaga 120, abayobozi batandukanye muri Guverinoma z’ibihugu byombi, yabereye i Kigali.

Umubano wa FERWAFA na FRMF ni nta makemwa kuva mu 2015, byatumye ibihugu byombi bifatanya mu buryo butandukanye, nko guhanahana ubumenyi mu by’umupira w’amaguru, Amavubi agakorera umwiherero muri Morocco cyangwa iy’icyo gihugu ikaza mu Rwanda, abakinnyi b’Abanyarwanda babashije kubona ubuvuzi bwisumbuyeho n’ibindi.

Map : Ahabanza  \  Rwanda  \  Amakuru Ashyushye

Ibitekerezo byatanzwe kuri iy'inkuru


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru