RUHAGOYACU.com

Mu cyumweru cyahariwe imikino Olempike hazubakirwa umuturage utishoboye i Gatagara

Mu cyumweru cyitiriwe olempike “Olympic Week/Semaine Olympique” kizatangira taliki 23 Kamena 2017, Komite Olempike ifatanyije n’abakinnyi b’Abanyarwanda bitabiriye imikino Olempike mu bihe bitandukanye ndetse na bagenzi babo barimo n’ibyamamare baturutse muri Leta zunze ubumwe za Amerika, bazubakira umuturage utishoboye.

Tariki 23 Kamena, u Rwanda ruzifatanya n’amahanga mu kwizihiza umunsi ngarukamwaka wahariwe kuzirikana indangagaciro z’imikino olempike. Kuri uwo munsi, ni bwoi mu Rwanda nk’umwihariko hazatangira icyumweru cyitiriwe olempike, cyateguwe na Komite Olempike y’u Rwanda, ifatanyije n’Umuryango utari uwa Leta witwa ‘Kids Play International (KPI)’.

Bizimana Festus, Visi Perezida wa kabiri wa Komite Olempike y'u RwandaBizimana Festus, Visi Perezida wa kabiri wa Komite Olempike y’u Rwanda

Muri icyo cyumweru hazakorwamo ibikorwa bitandukanye bigamije kugaragaza uko siporo n’indangagaciro z’imikino olempike bishobora guhuriza hamwe no guhindura umuryango nyarwanda mwiza kurushaho.

Ibyo bikorwa birimo icyo kubakira umuturage utuye i Gatagara nk’uko Visi Perezida wa Kabiri wa Komite Plempike y’u Rwanda, Bizimana Festus yabigarutseho mu kiganiro n’abanyamakuru cyabaye kuri uyu wa 19 Kamena 2017.

Bizimana yagize ati “Umuganda twawuteguye dufatanyije n’inzego z’ibanze, tuzawukorera kju kagari, tunawukorere mu rugo rw’umuntu, umudamu witwa Pelagie, tujyeyo tumufashe kuzamura inkuta z’inzu ye, mu kumwubakira.”

Ku munsi wo gutangiza Icyumweru cyitiriwe Olempike ari na wo munsi nyirizina wahariwe kuzirikana indangagaciro Olempike, hateganyijwe ibikorwa bitandukanye bizabimburirwa no gusura Urwibutso rwa Jenoside rwa Kigali ku Gisozi, maze ku gicamunsi hakaba ari bwo hazafungurwa ku mugaragaro icyo cyumweru, uwo muhango ukazabera kuri Stade ya Kigali i Nyamirambo.

Abanyamakuru bagejejweho gahunda y'ibikorwa bizaba bigize Icyumweru Olempike mu RwandaAbanyamakuru bagejejweho gahunda y’ibikorwa bizaba bigize Icyumweru Olempike mu Rwanda

Kuwa gatandatu tariki ya 24 Kamena ni bwo hateganyijwe igikorwa cy’umuganda rusange kizakorerwa i Gatagara mu Karere ka Nyanza, aho uwo muturage azubakirwa inzu, ubundi hagatangwa ubutumwa butandukanye buzaba bugamije gusobanurira abaturage indangagaciro z’imikino Olempike.

Ku cyumweru tariki ya 25 Kamena ni bwo hateganyijwe ibikorwa byinshi, aho ibigo by’amashuri bitandukanye byo mu Karere ka Nyanza bizahurira i Gatagara, hakazaba imikino myinshi ndetse hanatangwe ubutumwa butandukanye.

Kuwa mbere tariki ya 26 Kamena bwo ibikorwa bya ‘Olympic Week’ bizakomeza hasurwa ibigo by’amashuri bikorana na ‘Kids Play International’ mu bikorwa bitandukanye byo guteza imbere no kumenyekanisha indangagaciro Olempike.

Uyu ni na wo munsi abanyamahanga bazitabira iki cyumweru bazatemberezwa ibice bitandukanye by’igihugu, aho bazasura Ingoro z’Umurage w’u Rwanda bakarushaho gusobanukirwa amateka yarwo.

Habyarimana Florent, umukozi muri MINISPOC ushinzwe gukurikirana no gushaka impano z'abana muri siporo yagaragaje ko Icyumweru Olempike ari ingirakamaro, dore ko guteza imbere indangagaciro Olempike bigomba guhera mu bakiri batoHabyarimana Florent, umukozi muri MINISPOC ushinzwe gukurikirana no gushaka impano z’abana muri siporo yagaragaje ko Icyumweru Olempike ari ingirakamaro, dore ko guteza imbere indangagaciro Olempike bigomba guhera mu bakiri bato

Kuri 27 Kamena ari na wo munsi icyo cyumweru kizasozwaho, hazaba icyiswe “Coffe & Conversation”, aho bamwe mu bayobozi bakuru b’igihugu, abakinnyi batandukanye bitabiriye imikino olempike, abayobozi ba komite olimpike y’u Rwanda n’ab’Amashyirahamwe y’imikino atandukanye, bazateranira kwa Ambasaderi wa Leta zunze ubumwe za Amerika mu Rwanda, bakazaganira ku ndangagaciro z’imikino olempike n’uburyo zarushaho gutezwa imbere mu Rwanda.

Ni icyumweru kizitabirwa na bamwe mu bakinnyi bakomeye ku Isi bafite amateka mu mikino olempike nk’Umunyamerikakazi Ibtihaj Muhammad wegukanye umudali wa bronze muri Fancing (kurwanisha igisa n’inkota) mu mikino olempike ya 2016 yabereye muri Brazil, akaba afite n’amateka yihariye yo kuba ari we wa mbere wakinnye iyo mikino yambaye ‘Hijab’ (umwambaro uhisha umusatsi ku bakorwa b’abayisilamu).

Icyo cyumweru kizitabirwa kandi n’Umunyamerikakazi Anne Poulin wabaye umukinnyi ukomeye w’umupira w’amaguru muri Arizona State University nyuma akaza no kwerekeza ku mugabane w’u Burayi mu ikipe ya Nottingham Forest mu Bwongereza, uyu akazaba ari kumwe na Jeremiah Attaochu ukomoka muri Nigeria ukina American Football.

Umuyobozi wa 'Kids Play International' mu Rwanda, ngo muri gahunda yo guteza imbere indangagaciro Olempike uyu muryango urimo kubaka ikibuga cy'imikino i GatagaraUmuyobozi wa ’Kids Play International’ mu Rwanda, ngo muri gahunda yo guteza imbere indangagaciro Olempike uyu muryango urimo kubaka ikibuga cy’imikino i Gatagara

Uretse aba kandi hazaba hari umunyamuziki wo muri Canada, Drew Seeley, ndetse n’icyamamare mu guserebeka ku rubura Tracy Evans wanashinze umuryango ‘Kids Play International’.

Amy Paffrath wamamaye mu gukina film muri Leta Zunze Ubumwe za Amerika ni undi mu byamamare bizaba biri mu Rwanda, uyu akaba yaranegukanye igihembo cya Emmy Award.

Mu banyarwanda bazaba bari muri ibyo bikorwa twavuga nka Salome Nyirarukundo na Epiphanie Nyirabarame basiganwa ku maguru, Jeanne d’Arc Girubuntu na Nathan Byukusenge basiganwa ku magare n’abandi batanduikanye bahagarariye u Rwanda mu mikino Olempike mu bihe bitandukanye.

Map : Ahabanza  \  Rwanda  \  Amakuru Ashyushye

Ibitekerezo byatanzwe kuri iy'inkuru


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru