RUHAGOYACU.com

Perezida wa FIFA, Giani Infantino yasuye urwibutso rwa Jenocide ku Gisozi mbere yo kuva mu Rwanda

Perezida w’ishyirahanwe ry’umupira w’amaguru ku isi, FIFA, Gianni Infantino yasuye urwibutso rwa Genocide yakorewe Abatutsi ruherereye ku Gisozi mbere yo gusoza uruzinduko yagiriraga mu Rwanda.

Nk’uko byari biteganyijwe mu ruzinduko perezida w’ishyirahamwe ry’umupira w’amaguru ku isi FIFA, Gianni Infantino yagiriraga hano mu Rwanda harimo gusura urwibutso rwa Genocide y’akorerewe abatutsi ruhereye ku Gisozi.

Infantino uyobora FIFA yageze ku Gisozi ahubatse urwibutso ku isaha ya saa tanu z’amanywa(11h:00) kuri iki Cyumweru, aherekejwe n’abandi banyacyubahiro batandukanye barimo Nzamwita Vincent Degaule uyobora ishyirahamwe ry’umupira w’amaguru mu Rwanda, FERWAFA.

Bakigera mu rwibutso bafashe iminota icumi berekwa film ikubiyemo amateka agaragara muri urwo rwibutso, aho bahavuye bajya kunamira no guha icyubahiro imibiri y’abatutsi bazize Genocide ishyinguye muri urwo rwibutso bafata umota wo kunamira inzirakarengane, banashyira indabo ku mva z’izi nzirakarengane zishyinguye muri urwo rwibutso.

Urugendo rwakomereje imbere mu rwibutso nyir’izina aho Perezida wa FIFA n’abari bamuherekeje basobanuriwe byinshi ku buryo Genocide yateguwe kugeza ishyizwe mu bikorwa ndetse ikanahoshwa n’abanyarwanda ubwabo amahanga atabigizemo uruhare.

Urugendo rwaje kurangira Gianni Infantino yanditse mu gitabo cy’urwibutso kigaragaza abantu batandukanye basuye uru rwibutso baturuka impande zitandukanye.

"Ibi bitwereka agaciro gakomeye k’ubuzima, agaciro ko gushyira hamwe, agaciro ko kwibuka kubera ko iyo ubashije kwibuka ahashize biguha n’umwanya wo gutekereza kuri ejo hazaza. Niyo mpamvu rero tubona kugeza ubu u Rwanda ari igihugu cyiza kandi mu byukuri ni igihugu cy’amahoro kirimo kwiyubaka byihuse n’umurava mwinshi."- Gianni Infantino aganira n’itangazamakuru nyuma yo gusura urwibutso.

Infantino yahagurutse mu Rwanda kuri iki Cyumweru amaze gusura urwibutso rwa Genocide ruri ku Gisozi nyuma yaho kuri uyu wa Gatandatu yari yayoboye umuhango wo gutangiza no gushyira ibuye ry’ifatizo ku nyubako ya Hoteli ya Ferwafa.

Map : Ahabanza  \  Rwanda  \  Amakuru Ashyushye

Ibitekerezo byatanzwe kuri iy'inkuru

  1. Nsanzamahoro

    Kuya 27-02-2017 saa 12:52'

    Turamushimira cyane kuko yakoze igikorwa gikomeye


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru