RUHAGOYACU.com

Stade nyinshi mu turere, kimwe mu bigenza abavuye mu ishyirahamwe rya Maroc

Abayobozi batanu baturutse mu ishyirahamwe ry’umupira w’amaguru muri Marco bageze i Kigali mu ruzinduko rw’iminsi itatu, aho baje kureba ibikorwa bitandukanye bazafatanyamo n’u Rwanda, harimo kureba uburyo mu turere tugize u Rwanda hakwirakwizwa stades nyinshi.

Aba bayobozi bageze i Kigali mu ijoro ryo kuwa kane, taliki ya 27 Mata, ni Hajji Mouad, Tahiri Driss, Terhzaz Mohammed, Amaoui Gueriri Anouar na Lakhimouli El Mustafa.

Gahunda yabo ni ugusura u Rwanda kugirango bamenye aho bagenda bafasha mu iterambere ry’umupira w’amaguru.

Biteganijwe ko kuri uyu wa gatanu bagirana inama na perezida w’ishyirahamwe ry’umupira w’amaguru mu Rwanda, Nzamwita Vincent de Gaulle, nyuma bagasura urwibutso rwa Jenocide rwa Kigali.

Kuwa gatandatu, taliki ya 29 Mata, aba bayobozi bazagirana inama n’abayobozi b’uturere twose tw’u Rwanda, kuko twatumiwe twose, ndetse bakazabonana n’abanyamakuru.

Umuvvugizi wa FERWAFA Ruboneza Prosper avuga ko uku kubonana n’abayobozi b’uturere bashaka kuzafasha u Rwanda kugirango rugire ibibuga bitandukanye hirya no hino mu turere.

Ati “ iyo abantu baganira bavugana ibintu bitandukanye, ariko by’umwihariko ni ukugirango turebe ko twagira amastades hirya no hino mu gihugu, turifuza ko twagira ibibuga bitandukanye mu gihugu hose, nibura muri buri karere hakaba hari ikibuga cy’umupira w’amaguru, mu mubano dufitanye na federation (ishyirahamwe) ya Maroc.

Yakomeje agira ati: N’ibyo ngibyo birimo, ariko urumva ko ibintu bizanozwa nyine muri ibyo biganiro bazagirana n’abayobozi b’uturere na federation y’umupira w’amaguru, uturere twose twaratumiwe ubwo ariko ntabwo ari itegeko haba hari n’uturere nawe uzi ubwawe dufite ibibuga, dushobora kutagira ibindi twifuza ubwo nyine mu biganiro hazavamo ababikeneye kurusha abandi abe aribo bashyirwa imbere” Ruboneza.

Mu turere 30 tugize u Rwanda, uturere 6 nitwo twonyine dufite stade zirimo ikibuga cyiza cyo gukinirwamo .

Utwo turere ni Gasabo (Stade National Amahoro), Nyarugenge (Stade Regional ya Kigali), Kicukiro, Huye, Muhanga na Rubavu.

Aba bayobozi baje i Kigali nyuma y’amasezerano y’ubufatanye yasinywe hagati y’ishyirahamwe ry’umupira w’amaguru rya Maroc na FERWAFA, biteganijwe ko bazataha ku cyumweru taliki ya 30 Mata2017.

Map : Ahabanza  \  Rwanda  \  Amakuru Ashyushye

Ibitekerezo byatanzwe kuri iy'inkuru


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru