RUHAGOYACU.com
RuhagoYacu  |  Rwanda  |  Amavubi

Amavubi agiye kwisanga ku mwanya mubi yaherukagaho mu myaka 4 ishize

Ikipe y’igihugu Amavubi, iraza gutakaza imyanya 10 ku rutonde rushya rw’ishyirahamwe ry’umupira w’amaguru ku isi, yisange ku mwanya mubi kurusha indi yose, yabayeho mu gihe cy’imyaka 4 ishize.

U Rwanda kuri ubu ruri ku mwanya w’i 118 ku rutonde ngarukakwezi rukorwa n’ishyirahamwe ry’umupira w’amaguru ku isi ruheruka. Amavubi araza gutakaza imyanya 10, yisanga ku mwanya w’i 128, umwanya Amavubi yaherukagaho muri Kamena 2013.

Uru rutonde ngarukakwezi rurasohoka kuri uyu wa kane, tariki ya 4 Kamena. Ni urutonde rwerekana uko ibihugu birushanwa ku isi mu kwezi kwa Gicurasi 2017.

Amavubi kuva mu ntangiriro za 2013 yatangiye kugenda azamuka buhoro buhoro ku rutonde ngarukakwezi rwa FIFA, aza no kurangiza umwaka wa 2014 ari ku mwanya wa 68 ku isi, umwanya mwiza ikipe y’u Rwanda ya ruhago yagize ku rutonde rukorwa na FIFA.

Gusa kuva uyu mwaka wa 2014 warangira, nta kindi cyakurikiyeho, buretse kubona Amavubi agenda atakaza imyanya ku rutonde rwa buri kwezi ubu akaba agiye kwisanga ku mwanya w’i 128.

Mu karere

BR Report yerekana ko ikipe ya Uganda iraza kuzamuka imyanya 2, ikava ku mwanya 72, igafata umwanya wa 70.

Igihugu cya Kenya, kirazamuka imyanya 4, gifate umwanya wa 74 ku isi.

U Burundi buraza kwisanga ku mwanya w’i 148 ku isi, umwanya mubi wa mbere u Burundi bugize mu myaka 10 ishize.

Ikipe ya Tanzania nayo iraza gutakaza imyanya 4 kuri uru rutonde rurasoka kuri uyu wa 4, Taifa Stars ikaba iraza ku mwanya w’i 139.

Hanze y’Africa:

Ikipe y’igihugu ya Pologne byitezwe ko irazamuka imyanya 10, ikava ku mwanya wa 20, ikaza ku mwanya wa 10 hamwe na Espagne, umwanya mwiza igihugu cya Pologne gifashe kuri uru rutonde.

Biteganyijwe ko amakipe 9 ya mbere ku isi atari buze guhinduka, aho Brazil iraza gukomeza kuyobora uru rutonde ku rwego rw’isi.

Iyi kipe ya Brazil kuva yatangira gutozwa n’umutoza Tite imaze gutsinda imikino 8 yose yakinnye, harimo umukino banyagiyemo Argentina ibitego 3-0, n’umukino batsinze Uruguay ibitego 4-1.

Map : Ahabanza  \  Rwanda  \  Amavubi

Ibitekerezo byatanzwe kuri iy'inkuru

  1. hbn

    Kuya 31-05-2017 saa 15:56'

    ntibitangaje kabisa ubundi bahinduye abayobozi ba ferwafa bagashyiraho abashoboye bakareka kudutobera umupira nigihugu muri rusange

  2. ildebrande

    Kuya 31-05-2017 saa 15:48'

    mana kipe yacu irambaba ngaho umudage natwereke icyo ashoboye

  3. knc

    Kuya 30-05-2017 saa 11:40'

    Ntago byaba bitangaje kuko nicyo gihembo Federation yakoreye ! none se baduha amanota avuye he he ?


  • AMATEGEKO AGENGA IYANDIKA RY'IGITEKEREZO CYAWE:
    Andika Izina na E-mail yawe ahabugenewe. Igitekerezo cyawe kigaragara nyuma y'isuzuma rikorwa na RuhagoYacu.com. Iyo igitekerezo cyawe kitajyanye n'inkuru cyangwa gitandukiriye amahame agenga abasiporitifu kirasibwa.
    Murakoze!

Izindi nkuru