Joe

Mu mukino wo kwishyura wa CAF Champion League wari uteganyijwe kuri uyu wa gatanu tariki ya 6/04/2012 hagati ya Etoile Sportive du Sahel na APR FC yo mu Rwanda waje kurangira ikipe ya APR FC isezerewe ku bitego 3 kuri 2.

Ni umukino wasifuwe n’abasifuzi bakomoka muri Ghana aribo : Agbovi William ( Hagati mu kibuga ) , Laryea David na Salifu Malick Alidu ( ku mpande). Aho abafana bensho bari bategereje uyu mukino.

Umukino waje gutangira nabi ku ruhande rwa APR FC kuko ku munota gusa wa 9 ikipe ya Etoile Sportive du Sahel yari imaze kunyeganyeza amazamu imbere y’abafana bayo , igitego cyatsinzwe na Lassad Jaziri.

Ibintu byagaragariraga buri wese ko ikipe ya APR FC iraza kugorwa n’umukino ariko ku munota wa 39 Danny Wagaruka yaje guhindura ibintu maze amakipe yombi ajya kuruhuka anganya igitego kimwe kuri kimwe.

Ikipe ya APR FC yari isigaje iminota 45 ngo isezerere ikipe ya Etoile Sportive du Sahel ntiyorohewe mu gice cya kabiri dore ko yagerageje kugarira uko bishoboka ikanaza kubona igitego cya kabiri gitsinzwe na Papy Faty.

Iki gitego kikaba cyagoye ikipe ya Etoile Sportive du Sahel yagerageje gusatira ikipe ya APR FC ariko bikanga kugeza umukino wenga kurangira.

Induru n´akavuyo mu mukino !

Umukino ugeze mu minota yanyuma ngo urangire ikipe ya APR FC niyo yari ifite amahirwe yo gukomeza dore ko ariyo yari iri imbere mu bitego ubwo yari ifite ibitego 2 kuri 1.

Ibi byaje gukomerera ikipe ya APR FC ubwo iminota isanzwe y´umukino ikipe ya Etoile Sportive du Sahel yabonaga igitego cyo kunganya ariko nticyari gihagije ngo ikomeze.

Iki gitego kikaba cyabaye imbarutso y´akavuyo kadasanzwe mu kibuga kanaje gutuma ikipe ya APR FC ibona ikarita y´umutuku yahawe Papy Faty.

Ibi byagize ingaruka mu mutwe ku basore ba APR FC babaye nkaho bacitse intege maze ntibabasha kugarira bikomeye dore ko hari hongeweho iminota myinshi kubera akavuyo kari kabaye mu kibuga. Umupira wenda kurangira nibwo umusore Lassad Jaziri yaje kubona igitego cya 3 cya Etoile Sportive du Sahel, igitego cyahise gisezerera ikipe ya APR FC.

Muri rusange ikipe ya APR FC ikaba yazize kuba itarabashije kwitwara neza mu mukino ubanza nkuko byagaragariye buri wese kuko iyo iza kuba yaratsinze igitego mu buryo yabashije kubona mu mukino ubanza iba yahise isezerera ikipe ya Etoile Sportive du Sahel.

Mu yindi mikino ya CAF Champion League yabaye kuri uyu wa gatanu ikipe ya Esperance yatsinze ikipe ya Brikama ku bitego 3 kuri 1 mu gihe Al-Hilal yatsinze DFC 8e Arrondissement ku bitego 2 ku busa.