Mu gihe amakuru akomeje gutangazwa yuko agiye kwerekeza muri Manchester United, RuhagoYacu igiye kubanyuriramo ibijyanye n’umukinnyi Shinji Kagawa mu buzima bwe bw’umupira w’amaguru.

Muri sezo ebyiri zishize, Shinji Kagawa ntago yari azwi hanze y’Ubuyapani, ariko abantu barebye kure ubwo bavumburaga uyu mukinnyi ukina hagati ubwo yafashaga ikipe ya Cerezo Osaka kuzamuka mu cyiciro cya mbere mu Buyapani muri sezo 3 gusa . None ubu ari hafi kwerekeza mu Bwongereza mu ikipe ifite amateka muri Barclays Premier league hariya Theatre of Dreams - nyuma yaho ikipe ya Red Devils yemeye gutanga Miliyoni 13 zama Paundi (£13miilion) iziha ikipe ya Dortmund yo mu Budage.

Kagawa niwe wabaye umuyapani wa mbere gusinya amasezerano ya level ya proffessional mbere yuko arangiza amashuri y’isumbuye. Afite imyaka 18 y’amavuko yabashije kubona umwanya mu ikipe ya mbere ya Cerezo, ndetse abyitwaramo neza yinjiza ibitego anakina neza mu kibuga hagati.

Kagawa yinjije ibitego 27 mu mikino 44 yakinnye muri sezo yo mu mwaka 2009 anafasha ikipe ya Cerezo kuzamuka mu cyiciro cyo hejuru mu Buyapani nyuma yo kumanuka mu myaka itatu yari ishize. Ariko ntago yakinnye cyane muri shampiyona yo mu Buyapani ubwo iyo kipe yari ikizamuka, kuko umudage bita Thomas Kroth yahise abijyamo bitewe n’ubuhanga yari amaze kubona kuri uwo mukinnyi ahita amujyana muri Borussia Dortmnund.

Performance ye muri Dortmund yariyerekanye ubwayo; muri sezo ye ya mbere ku mugabane w’Uburayi, Kagawa yaje kugira imvune yatumye amara hanze hafi igice cya shampiyona, ariko muri uyu mwaka yariyerekanye cyane ubwo yashyiragaho rekodi shya y’umuyapani wa mbere mu bakinnye i Burayi wabashije kwinjiza ibitego 13 mu mikino 32. Shinji Kagawa iyo afashe umupira, awutanga neza ndetse no gutera amashoti ya kure.

Mu gihugu iwabo muri Japan, Kagawa ni umwe mu bakinnyi bakoze izina cyane kuko akoreshwa cyane ku matangazo y’ibinyombwa hamwe na video games.

Jezi ye niyo igurishwa cyane mu maduka acuruza ibikoresho bya siporo, ndetse bikaba byitezwe yuko mu gihe azaramuka yerekeje muri Manchester United biziyongera kuko niyo kipe ikundwa ku mugabane wa Asia.

Shinji Kagawa amaze kwamamara nkuko abandi bakinnyi bakomoka mu Buyapani nka Yuto Nagamoto wa Inter Milan na rutahizamu wa CSKA Moscow Keisuke Honda bamamaye.

Ariko itandukaniro nuko bagenzi be Nagamoto na Honda bo bakunda kwigaragaza mu bitangazamakuru , Kagawa we ni nka Paul Scholes ntago akunda kwimenyekanisha mu bitangazamakuru kubera isoni agira.

Nubwo amaze imyaka ibiri mu Budage ntago arabasha kumenya ururimi rwaho hari umusemuzi bahorana.

Mu gihe yaramuka yerekeje muri England bizamusaba kugerageza gutera ikirenge mu cya Paul Scholes kugirango azirinde amagambo yo mu bitangazamakuru, bimwe byatangiye gutangaza yuko Manchester United bagiye kumugura kugirango bazacuruze imyenda myinshi yanditseho izina rye mu gihugu cy’Ubuyapani no ku mugabane wa Asia.

Muri sezo ebyiri amaze muri Dortmund - yafashije iyo kipe kwegukana ibikombe byo mu Budage ndetse no kwiyerekana nk’ikipe nziza kurusha Bayern Munich.