Ishyirahamwe ry’umupira w’amaguru ku isi FIFA ryashyize ahagaragara urutonde ngaruka kwezi rw’uburyo amakipe akurikirana mu mupira w’amaguru.

Uru rutonde rushingira ahanini ku mikino iheruka ibihugu biba bimaze gukina y’amarushanwa ndetse n’imikino ya gicuti yemewe na FIFA. Ikipe y’igihugu cy’u Rwanda Amavubi ubu yaje ku mwanya w’119 nyuma yuko ku rutonde ruheruka yari ku mwanya w’105.

Mu mukino igaragara ku rubuga rwa FIFA yatumye iyi kipe imanuka iyi myanya yose harimo uwo batsinzwemo na Algeria 4 ku busa, uwo banganyije na Tchad kimwe kuri kimwe ndetse n’uwo Amavubi yanyagiwemo na Tunisia 5 kuri kimwe.

Si iyi mikino gusa FIFA yabaze kuko hanabazwe n’amanota Amavubi yagiye agira mu myaka 4 ishize hongeyeho nayo yari ifite yose agakusanywa.

Amanota agenda ahabwa uburemere bikurikije imyaka , aho ku mwaka wa mbere ariwo wa 2012 , amanota ahabwa uburemere bw’100%, aha kugeza ubu Amavubi akaba afite amanota 189.2 muri uyu mwaka wa 2012.

Ku mwaka wa kabiri ariwo wa 2011, amanota ahabwa uburemere bungana na 50% aho Amavubi afite amanota angana na 32.19 , ku mwaka wa 3 ariwo wa 2010 , amanota ahabwa uburemere bwa 30% aho Amavubi yari afite amanota angana na 21.47 naho ku mwaka wa 4 ariwo wa 2009, amanota agahabwa uburemere bwa 20% aho Amavubi yari afite amanota angana na 41.07. Iyo uteranyije aya manota yose ( 189.2+32.19+21.47+41.07 =284 ) usanga Amavubi afite amanota 284.

Igihugu cya Benin kiracakirana n’Amavubi muri iyi weekend cyo cyaciye agahigo ko kuzamuka imyanya myinshi (52) kuko cyavuye ku mwanya w’124 ubu kikaba kibarizwa ku mwanya wa 72 ku isi . Mu gihe igihugu cya Algeria nyuma yo gutsinda Amavubi ubu kiri kumwanya wa 32 ku isi ndetse n’uwa 3 muri Africa.

Muri rusange ibihugu 10 bya mbere ku isi ni :

1. Espagne
2. Uruguay
3. Ubudage
4. Ubuholandi
5. Brazil
6. Ubwongereza
7. Argentina
8. Croatia
9. Denmark
10. Portugal

Muri Africa uko bihagaze :

1. Cote d’Ivoire ikaba n’iya 16 ku isi,
2. Ghana
3. Algeria
4. Libya
5. Mali
6. Zambia
7. Tunisia
8. Misiri
9. Gabon
10. Sierra Leone

Mu karere ka CECAFA uko bihagaze :

1. Uganda iza ku mwanya wa 94 ku isi ,
2. Sudan iza ku mwanya wa 101 ku isi ,
3. Kenya iza ku mwanya wa 111 ku isi ,
4. Rwanda iza ku mwanya wa 119 ku isi ,
5. Ethiopia iza ku mwanya wa 130 ku isi ,
6. Burundi iza ku mwanya wa 131 ku isi ,
7. Tanzania iza ku mwanya wa 139 ku isi ,
8. Eritrea iza ku mwanya wa 190 ku isi ,
9. Somalia iza ku mwanya wa 191 ku isi ,
10. Djibouti iza ku mwanya wa 197 ku isi ,

Urundi rutonde nkuru ruzasohoka tariki ya 04 z’ukwezi gutaha.