Irushanwa rya Euro 2012 kuri iki cyumweru tariki ya 10/06/2012 ryarakomeje aho bakinnye imikino yo mu itsinda C itari yoroshye na gato.

Ikipe ya Spain ifite iki gikombe yanganyije na Italy mu mukino utari woroshye na gato ku mpande zose kandi wari unogeye ijisho.

Ikipe ya Spain yakinnye umukino wayo 4-3-3 aho rutahizamu yari yabaye Fabregas mu gihe Fernando Torres na Fernando Llorente bo bari bashyizwe ku gatebe k’abasimbura n’umutoza Vicente Del Bosque.

Kurundi ruhande Italy yo yaje yiteguye urugamba ubwo Cesare Prandelli yakinishaga 3-5-2 kugirango aze kubona uko azibira abakinnyi bo hagati ba Spain bazwiho guhanahana umupira bidasanzwe.

Ibintu ntibyaje kuba neza kuko Italy niyo yasaga nkisatira cyane ariko igice cyambere cyaje kurangira amakipe yombi anganya ubusa ku busa nubwo Spain ariyo yari yagerageje kugumana umupira igihe kinini.

Mu gice cya kabiri nyuma yaho Mario Balotelli arase igitego cyari cyabazwe na benshi agasimbuzwa na Antonio Di Natale utaratinze guhita anyeganyeza inshundura za Iker Casillas wari wakoze akazi gakomeye muri uyu mukino.

Ibi ntibyatinze kuko Silva ku mupira mwiza yahereje Fabregas maze ahita yishyura icyo gitego bidatinze.

Amakipe yombi yakomeje gusatira ariko bikanga kureba mu izamu kugeza mu minota yanyuma Torres wari waje asimbuye yananiwe gutsinda Buffon wari wasohotse cyane maze amakipe yombi atahana inota rimwe.

Mu wundi mukino ikipe ya Ireland ntiyorohewe na Croatia kuko yayitsinze ku bitego 3 kuri 1, aho ikipe ya Croatia ariyo ubu iri ku mwanya wa mbere muri iri tsinda C.

Kuri uyu wa mbere mu itsinda D hateganyijwe umukino urahuza Ubufaransa n’Ubwongereza nyuma yaho Ukraine igakina na Sweeden.