Umutoza wa Police FC Goran Kopunovic aratangaza ko iyi kipe ikeneye abakinnyi nka bane cyangwa batanu mu mwaka wa shampiyona uza 2012-2013.

Nyuma y’uko ikipe ya APR FC isezereye Rayon Sports mu mikino ya kimwe cya kabiri k’igikombe cy’Amahoro, Police yahise ibona tike yo kuzahagararira u Rwanda mu gikombe cya Confederation Cup. Iyi kipe rero, yahise yiyongerera izindi nshingano zo kwitwara neza haba muri iki gikombe ndetse no muri shampiyona.

Nubwo hakiri kare ngo shampiyona y’umwaka utaha itangire, umutoza Goran yatangarije RuhagoYacu ko yatangiye kuvugana n’ubuyobozi bw’ikipe ye mu gushaka uburyo bazitwara neza gihe kizaza. Yagize ati : “Nyuma y’imyaka ibiri ntangiye kumenyera buhoro bihoro u Rwanda, umwaka wa mbere umwanya wa gatatu, umwaka wa kabiri umwanya wa kabiri, birumvikana umwaka utaha ni izindi nshingano kuri jye igikombe ni cyo mpanze amaso cyane.”

Umutoza wa Police ariko yakomeje avuga ko gutwara igikombe atari ibintu byava mu kirere ngo bibagweho. Bityo ko bagomba kwitegura bashyizemo ingufu.

“ “Kugirango dutware igikombe dukeneye amaraso mashya, dukeneye abakinnyi bandi bafite uburambe mu kibuga, ubu mfite amazina nk’ane cyangwa atanu. Akazi kange ni ugutanga amazina maze komite yange igatangira kureba uburyo bwo kuboneka ariko mubyukuri nkeneye abakinnyi bane cyangwa batanu muri shampiyona itaha.” Goran Kopunovic.

Nubwo iyi kipe ivuga ko ishaka abo bakinnyi ariko, amakuru ava muri Tanzania avuga ko ikipe ya Yanga igeze kure mu biganiro n’umukinnyi Kagere Meddie wanatsinze ibitego byinshi mu gikombe cy’Amahoro giheruka. Uyu akaba yararangije amasezerano n’ikipe ya Police FC.