Ikipe ya Mukura Victory Sports iri mu biganiro n’umutoza Didier Gomez Da Rosa ngo abe yatoza iyi kipe nkuko bitangazwa n’umunyamabanga w’iyi kipe Olivier Murindahabi.

Uyu mufaransa ngo ashobora kuza gusimbura umutoza Akoko Godefroid ndetse akaba yahigika umutoza Emmanuel Ruremesha nawe uri mu biganiro n’iyi kipe.

Tuganira n’umunyamabanga w’iyi kipe Olivier Murindahabi yatwemereye ko bari kuvugana n’aba bagabo bombi gusa ko mu minsi ya vuba abafana ba Mukura VS baraba bamenye umutoza w’ikipe yabo.

“Kugeza ubu ntago turamenya umutoza tuzakorana nawe, ariko ntago birenga itariki ya 20 Nyakanga 2012 kuko ariyo abakinnyi bazagaruka mu myitozo ntibizarenga icyo gihe tutaramubona”. Olivier.

Nyuma yuko umutoza Akoko Godefroid asezerewe ndetse n’uko umutoza Ruremesha Emmanuel atoza iyi kipe mu gikombe cy’Amahoro, twashatse kumenya niba haba hari abandi batoza baba bari kuvugana n’iyi kipe kuzabana nayo kuva mu mwaka utaha wa shampiyona. Olivier Murindahabi yakomeje abitubwira:

“Nta mazina menshi dufite ariko hari abo twari twatangiranye kuvugana”

“Duteganya kuvugana na Ruremesha hakaba n’undi mutoza w’umuzungu witwa Didier Gomez Da Rosa ni umufaransa nawe turi kuvugana.

“Duheruka kumwoherereza uko amasezerano twifuza kugirana nawe yamera, ubwo dushoboye kubyumvikanaho nawe yaba umutoza wa Mukura VS umwaka utaha”.

Olivier ariko yavuze ko batarambirije kuri uyu mufaransa gusa, ariko avuga ko hagati ya Ruremesha Emmanuel n’uyu Gomez ariho hazava umutoza wa Mukura VS.