Nko muri Kiyovu Sports, Jean Marie Ntagwabira asize Rayon Sport iheruheru. Gusa igikomeje gukurura impaka ni akajagari karangwa mu ikipe y’umweru n’ubururu, gashobora gukurura ibibazo bikomeye mu mupira w’u Rwanda.

Ijisho Rya Ruhago ryongeye kwitegereza ibivugwa nyuma y’ukwegura kwa Jean Marie Ntagwabira. Umutoza wungirije mu ikipe y’igihugu akaba yaramennye ibanga rikomeye ndetse rishobora no kumugwa nabi.

Amagambo yatangajwe n’umutoza Jean Marie mu busanzwe si ayo kwizerwa.

Benshi bibuka uko yavuye muri Kiyovu Sports. Agasiga abagonganishije imitwe, mu gihe iyi kipe yari yatangiye kubona ikerekezo nyacyo mu mupira w’i Rwanda.

Hari abasesenguzi bemeza ko Jean Marie Ntagwabira atagenzwa na kamwe; uretse gukoresha ingengo y’imari itubutse, kenshi mu buryo budasobanutse, ikinamico mu igura ry’abakinnyi n’abasifuzi, agira n’ubryo asopanya inzego z’ubugenzuzi asanzeho. Bityo agasigara akora icyo ashaka uko yishakiye. Urugero: Kiyovu Sports yari ifite igitsure gikarishye ku ikoresha ry’ubushobozi buke bwayo, mbere y’uko Florent Habyarimana wari “team manager” yeretswe umuryango bisabwe na Jean Marie Ntagwabira.

Ikindi ni ukwitarutsa imvano y’ibibazo ikipe atoza iba irimo. Abasesenguzi benshi bemeza ko Jean Marie Ntagwabira agenzura kandi akanagaraguza agati itangazamakuru uko yishakiye. Akihutira gutanga amakuru ashyushye kandi kenshi atunga agatoki zimwe mu ndakoreka mu mupira w’amaguru, bityo rubanda bose bakarangarira aho ikibazo kitari. Ariko kandi ibi byose abifashwamo n’ubuyobozi bw’amakipe bumugira akamana, bugatakaza igihagararo imbere ye.

Amwe mu magambo y’uyu mutoza ni inkongi y’umuriro

Nyuma yaho ashyize mu majwi ikipe ya Kiyovu Sport na Rayon Sports mu bikorwa bya ruswa, ndetse akaba umugabo wo kubihamya, haribazwa igikurikiraho. Abasesengura ibya ruhago yacu ntakizere bafitiye FERWAFA ku byemezo yafatira uyu mutoza n’amakipe aregwaho ruswa. Bibaye kenshi irebera.

Mu busanzwe iki ni cyo igihe nyacyo ku bayobozi bashya, cyo guca akajagari mu mupira wacu... Ndetse no gushimangira igitsure cyabo!

Ku rundi ruhande, haribazwa niba inzego z’igihugu zitihanganira na busa abakekwaho ruswa, kuba zitazagira icyo zibikoraho, hakurikiranwa abantu ku giti cyabo bashyizwe mu majwi.

Mu gihe akiri umutoza wungirije mu mavubi wiyemerera ko akoresha ruswa, benshi baribaza niba ikipe y’igihugu iri mu ntoki nziza kandi zizewe. Hari abasanga umwambaro w’igihugu atawambarana ibikorwa by’urukozasoni... Tubitege amaso!