Paris Saint-Germain kuri uyu wa gatandatu tariki ya 14/07/2012 yanditse andi mateka mu igura ry’abakinnyi ubwo yaguraga umukinnyi Thiago Silva imukuye mu ikipe ya AC Milan ku kayabo ka miliyoni 42 z’Ama euro.

Thiago Silva wahise uba umukinnyi wa kabiri ukina inyuma uhenze ku isi nyuma ya Rio Ferdianand akaza ahembwa akayabo ka miliyoni 9 ku mwaka z’ama euro mu gihe kingana n’imyaka 5.

Uyu musore ukomoka muri Brazil ni umwe muri ba myugariro beza bari basigaye bigaragaza muri Serie A aho benshi bemezaga ko ari umwe muri ba myugariro beza ku isi magingo aya.

Kuza kwa Thiago muri PSG kukaba kwerekanye ko ikipe ya AC Milan na Silvio Berlusconi muri iyi minsi bari mu bihe bibi by’ubukungu aho na Zlatan Ibrahimovic ibiganiro bigeze kure hagati y’amakipe yombi ngo abashe kujya muri iyi kipe ya PSG.