Umutoza watozaga ikipe ya Marines Rajab Bizumuremyi yagizwe umutoza wa Etincelles aho yaje asimbuye Sogonya Hamiss “Kish” utararangije shampiyona ishize.

Nkuko twabitangarijwe na Perezida wa Etincelles FC Dukuze Christian,ngo ubu umutoza ku munsi w’ejo yahise atangira imyitozo n’iyi kipe ndetse nyuma y’ukwezi bakazanashyira hanze imihigo bazaha Rajab muri shampiyona itaha.

“Twasinyanye amasezerano y’umwaka, imihigo tuzayisinyana nyuma y’ukwezi amaze kureba uko ikipe imeze n’ abakinnyi ashobora kubona noneho dufatire aho tugire imihigo dusinyana kandi izajya isuzumwa buri mezi atatu”, Dukuze.

Muri iyi kipe yo mu burengerazuba ngo barambiwe abatoza batagira intego ari nayo mpamvu bazasinyana imihigo na Rajab. Ubwo twaganiraga na perezida wa Etincelles mu minsi yashize yari yabitubwiyeho: “Ntago twahamya ko amakipe yose cyane iyacu, twabona amfarannga yo guhemba umutoza ngo atsinde cyangwa atsindwe, “turashaka umutoza utsinda byamunanira kimwe n’abandi bantu bose akagenda”.

Ikipe ya Etincelles yarangije ku mwanya wa 7 muri shampiyona iheruka nyamara yari iyoboye izindi mu gice cya mbere cya shampiyona. Kuri Dukuze Christian ngo basanga byaratewe n’umutoza utari mwiza ndetse n’abakinnyi bagiye bitwara nabi ari nayo mpamvu ubu bashizeho komisiyo ishinzwe gushaka abakinnyi.