Kuwa Gatandatu tariki ya 28/07/2012 ku kibuga cya FERWAFA habereye umukino wa gicuti ku makipe atarabigize umwuga akina ibyo kurwanya ubusaza, yiganjemo abakinnyi bigeze kuwutera ndetse bamwe ubu bakaba ari abatoza b’amakipe atandukanye mu Rwanda, harimo abasifuzi nabo bagaragara muri ayo makipe.

KARIBU FC

Ikipe ya Amigo isanzwe yitoreza kuri icyo kibuga naho ikipe ya Karibu ikaba yitoreza i Nyamirambo, zatangiye umukino zose zakaniye maze ikipe ya Karibu ifungura amazamu hashize iminota mike umukino utangiye ku gitego kiza cyinjijwe na Boniface Nsabimana ushinzwe amarushanwa muri FERWAFA.

AMIGO FC Ikipe ya Amigo yahise ikanguka maze itangira gusatira nubwo Didier Bizimana yabyitwaragamo neza ku ruhande rw’inyuma rwa Karibu, Amigo yaje kubona igitego cyo kwishyura gitsinzwe na Petit Jano, nyuma yaho gato Abdoul w’umusifuzi yaje kubonera Amigo igitego cya kabiri, igice cya mbere kirangira Amigo 2-1 Karibu.

Mu gice cya kabiri habayeho gusimbuza ku mpande zombi abakinnyi baje kongera imbaraga kuko dore ko izuba ritari ryoroshye, Hitimana Thiery wa Karibu yaje kwinjiza igitego maze umukino uhindura isura amakipe yombi anganya ibitego 2-2, mu minota ya nyuma umukinnyi Landry wa Amigo yaje kwinjiza igitego cya gatatu ahita anasohorwa mu kibuga kubera imvune yagize ubwo yagonganaga n’umuzamu Muhamud Mossi. Karibu yashakishije igitego cya gatatu biranga maze umukino urangira Amigo itsinze Karibu ibitego 3-2 hakurikiraho igice cya gatatu cyaranzwe no kwiyakira ndetse n’ubusabane ku bakinnyi b’amakipe yombi. RuhagoYacu iganira na Eric ukinira ikipe Amigo FC yatangaje yuko iyo kipe iteganya imikino ya gicuti mu minsi iza uwo bazajya gukina i Bujumbura mu gihugu cy’Uburundi hamwe no muri Nigeria.