Ku Cyumweru tariki ya 29/07/2012 kuri Stade Regional i Nyamirambo hebereye umukino wo gushaka itike yo kujya mu gikombe cy’Afurika ku bakinnyi bari munsi y’imyaka 20.

Ikipe y’igihugu y’u Rwanda nyuma yo gusezerera ikipe na Nabimia mu cyiciro cya mbere yahatanaga n’ikipe ya Mali U 20 mu mukino ubanza, umukino watangiye Mali U 20 ishakisha igitego, Amavubi U 20 nayo ageregeza gukina nubwo mu kibuga hagati byagaragaraga yuko batahuzaga umukino, ku munota 22 wu mukino nibwo ku makosa yakozwe n’umuzamu Olivier Kwizera hamwe na bakinnyi b’inyuma umusore wa Mali U 20, Diallo Samba yatsinze igitego, amakipe yombi yagiye kuruhuka nta gihindutse u Rwanda U 20 0-1 Mali U 20

Mu gice cya kabiri Amavubi U 20 yagarutse bigaragra yuko bavuye kumva inama z’umutoza Richard Tardy na begenzi be aho bagerageje gukina, ariko kwinjiza ibitego bigakomeza kwanga, haje kubaho gusimbuza maze umuzamu Olivier Kwizera wari wagize ikibazo cy’imvune ku kaboko yaje gusimbuzwa na Ntaribi Steven, Eric Nsabimana nawe byaragaraga yuko imvune yagize ku mukino wa Nigeria wa gicuti yari ikimukurikirana yaje kuvamo asimburwa na Tibingana Charles, Bony Bayingana nawe asimburwa na Julius Bakabulindi.

Amavubi U 20 yasatiriye ashakisha kwishyura igitego yari yatsinzwe maze Emmanuel Sebanani Crespo yinjiza igitego cya mbere, igitego cyatumye Amavubi U 20 bagira ingufu nyinshi maze iminota 90 y’umukino irangiye, umusifuzi yerekanye yuko bongeyeho iminota 4 nibwo Umwungeli Patrick yatsinze igitego cy’umutwe ahita ahagurutsa abafana bari kuri stade babyina intsinzi y’Amavubi U 20 y’ibitego 2-1 cya Mali.

Abakinnyi babanjemo ku mpande zombi

Rwanda U 20: Olivier Kwizera, Jean Marie Rusingizandekwe, Emery Bayisenge, Patrick Umwungeli, Francois Hakizimana, Ntamuhanga Tumaine Titi, Jean d’Amour Uwimana, Eric Nsabimana, Kabanda Bonfils, Emmanuel Sebanani na Mbonye Bayingana Bonny

Mali U 20: Yirango Ally, Keita Ousmane, Diarra Boubacar, Samake Issaka, Traore Mahamadou, Denon Mamadou Bassamba, Mariko Adama Sekou, Diallo Samba, Traore Yousouf, Cisse Mahamane na Fofana Hamara