Imirimo yo kuvugurura ikibuga cya Huye igeze ku gace kayo ka kabiri ko gusiza ikibanza kizubakwamo ama gymnase na tribune. Iki gikorwa kikaba gikurikiye icyo gushyira Tapi mu kibuga cyarangiye mu mezi yashize.

Nyuma y’uko igikorwa cyo gushyiramo ubu bwatsi kirangiye benshi bari bibajije ko wenda ikipe ya Mukura VS yatangira kuhakinira cyane ko ikibuga cya Kamena ikiniraho kitabonwa neza na benshi.

Ibi ariko umuyobozi w’akarere ka Huye Muzuka Eugene yakuriye inzira ku murima abatekerezaga gutyo kuko ngo iki kibuga kizakinirwaho ari uko imirimo yo kugikora irangiye yose mu mezi 18 ari imbere anongeraho kandi ko Stade Kamena ntacyo itwaye.

“Ntago bakiniraho kuko babuza imirimo gukomeza neza, ikibuga kizarangira mu mezi 18 nibwo kizatangira gukoreshwa. Kamena n’ikibuga kiza, ahubwo icyo tugiye gukora ni uko twarinda abafana kwegera mu kibuga naho ubundi ni yo tuzakoresha Mayor Muzuka.

Abakurikiranye imwe mu mikino yakiniwe ku kibuga cya Kamena bavuze ko iki kibuga kitari ku rwego rwo gukinirwaho shampiyona. Kuko haba mu gihe k’izuba(Urugero match Mukura VS na Rayon Sports) cyangwa se mu mvura (Match ya Mukura na APR FC), iki kibuga kiba kitameze neza.

Abatoza nka Goran Kopunovic wa Police FC, Ernie Brandts wa APR FC, Ruremesha watozaga La Jeunesse n’abandi bagiye bijujutira ububi bw’ikibuga cya Kamena babonaga ko cyasaga nk’intabire. Ibi kandi byaje gushimangirwa n’uwatozaga Mukura VS Okoko Godefroid wavuze ko na we atishimira gukinira kuri icyo kibuga k’ikipe ye.

Dore amwe mu mafoto ya Stade Huye