Ku wa mbere tariki ya 13/08/2012, ni bwo biteganyijwe ko ikipe y’igihugu y’umukino w’amaboko y’abatarengeje imyaka 18, iraba ifashe indege yerekeza I Maputo muri Mozambique mu mikino nyafurika y’abatarengeje iyi myaka.

Iyi kipe yabigezeho nyuma yo gutsinda Kenya mu mikino y’akarere ka gatanu dore ko icyo gihugu ari cyo cyonyine kitabiriye iyo mikino yabereye I Kigali mu minsi yashize.

Abakinnyi b’umutoza Nenad Amanovic ariko, bagiye batarabonye imyitozo yose bifuzaga harimo no gukina imikino ya gicuti ndetse no kujya mu mwiherero muri Gabon. Umunyambanga mw’ishyirahamwe ry’umukino wa Basketball mu Rwanda Richard Mutabazi, yatangaje ko ibi byatewe n’amikoro make.

“Cyari ikifuzo cy’umutoza, natwe turabitegura ariko ntago twashoboye kubona amikoro bituma tugikura muri gahunda”

“Twateganyaga kujya muri Gabon ariko byari bihenze kandi twagombaga kubishaka mu byumweru bibiri gusa” Richard Mutabazi.

Iyi kipe yerekeje I Maputo kandi ngo izagerageza gutsinda imikino yayo yose n’ubwo intego yayo ya mbere ari ukureba urwego bariho cyane cyane ugereranyije n’andi makipe yo ku mugabane w’Africa. Gusa ariko, umutoza Nenad Amanovic tuganira, yirinze kuvuga umwanya bumva bakura muri Mozambique.

“Sinavuga umwanya tuzabona, ubusanzwe buri wese aba ashaka gutwara igikombe cyo kimwe n’abandi gusa ndatekereza ntavuga ngo ni uyu mwanya ariko navuga ko tuzatanga ibishoboka byacu bityo tugerageze gutsinda buri mukino”, Umutoza Nenad Amanovic

“Ntago tuzi imbaraga z’andi makipe kandi bisa nkaho andi makipe ntacyo atubwiye cyane ndashaka gusa ko ikipe yacu itanga imbaraga zayo zose zishoboka nkaba nakwizera ko tuzabona umwanya ushimishije natangaza ko ntashaka kuvugaho ubungubu”

Imikino y’I Maputo izatangira kuva tariki ya 16 kugeza ku ya 25 z’uku kwa munani. Abakinnyi bagiye kujyana n’umutoza ni abasanzwe dore ko amaraso mashya bari bategereje barimo abasore nka Manzi Dani na Rwabib Adonis, batabashije kuboneka.