Amajonjora U 20 umukino wo kwishyura

Mali 3:0 Rwanda( 4:2 mu mikino yombi)

“Ikibazo mfite kuri iyi kipe ni uko kuva yaba iy’abatarengeje imyaka 20 itazwi gutsindwa icyo ari cyo” Richard Tardy.

Kimwe mu byo umutoza w’ikipe y’abatarengeje imyaka 20 Richard tardy yahoraga afitiye ubwoba gisa nk’icyamubayeho ku mugoroba wo kuri uyu wa gatandatu tariki 11/08, ubwo ikipe atoza yatsindwaga ibitego bitatu ku busa igahita inasezererwa ku bitego bine kuri bibiri mu mikino yombi yo gushaka itike yo kujya mu gikombe cy’Africa cy’abari munsi y’imyaka 20.

Nyuma y’uko iyari ikipe y’abatarengeje imyaka 17 yakinnye igikombe k’isi ihinduriwe abatarengeje imyaka 20, yari itaratsindwa umukino n’umwe ndetse yari imaze imikino 4 yikurikiranya itsindira hanze.

Umukino w’aya mavubi mato I Bamako watangiye ikipe ya twa kagoma duto twa Mali isa nkaho ishaka gutsinda hakiri kare kuko yarushaga bigaragara ikipe y’u Rwanda. Ndetse kandi n’ubwo igice cya mbere cyarangiye ari ubusa ku busa ariko Mali yari yabonye amahirwe menshi.

Mu gice cya kabiri ni bwo ibintu byabaye bibi kuri U 20 kuko umunota wa 52 wasize batsinzwe ibitego bibiri ku busa aho umukinnyi Samba Diallo yari yananiwe guhagarikwa n’abinyuma b’Amavubi mato.

Ubwo u Rwanda rwageragezaga gushaka igitego kimwe cyashoboraga kuberekeza mu minota y’inyongera ahubwo rwaje gutsindwa igitego cya gatatu maze umukino urangira utyo.

Urugendo rero rw’ikipe y’abatarengeje imyaka 20 rwo kuba bajya mu gikombe cy’Africa rwaje kurangirira I Bamako dore ibitego bibiri kuri kimwe bari batsinze mu mukino ubanza ntacyo byabamariye.

Ikipe ya Mali izakina na Zambia mu kwezi kwa cyenda maze ikipe imwe muri izi abe ari yo izajya mu gikombe cy’Africa ku bakinnyi bari munsi y’imyaka 20. Zambia yazamutse byoroshye nyuma y’uko Lesotho bagombaga gukina yikuye mu marushanwa.